17 liv pou w chanje lavi w an 2025.

Menm si w pa renmen li.

Istwa mwen ak liv biza anpil.

Lontan, mwen pat renmen li.
Kounya, preske chak jou map pale de liv tankou se te sèl sijè mwen te konnen.

Mwen pap pè poum di Liv chanje lavi’m.

Men sa pat toujou konsa…

Mwen pat nan fè lekti a lontan,

paske mwen te wèl kòm yo move bagay.

Pou mwen se te aktivite fanm.

E pi fò liv mwen te konn wè moun ap li se Roman, ti bagay istwa damou.

Mwen pat wè mwen menm ki pral chita li yo.

E sa te konn lakoz mwen pase plis tan nan:

• Jwe foutbòl

• Gade seri ak fim

• Jwe sou Playstation

Depi se pou manyen liv: Fòk yo ta fòse’m.
Se sak fem te konn kòmanse kèk liv, jis pou ka fè sanblan.

Depi se pou plezi: Se la mwen vle rete.
Se sak fèm te vinn bon nan jwe FIFA anpil (jwèt football)

Jiskaske, yon grenn liv ta pral chanje tout bagay…

Mwen pa sonje kisa ki te rive egzakteman,

Men mwen kwè mwen te santi’m raz anpil.

E te gen yon pakèt liv sèm nan genyen ki anpile lakay la.

Nan gade sa yo ye, gen youn ki atire atansyon’m.

L’homme le plus riche de babylone

Pandan map di nan tèt mwen piga se yon vye istwa lanmou,

Mwen chita atè a, epi mwen li do liv la.

“Te gen yon pwofesè ki te di se kote poum toujou dwe li an premye”

Jis pa reflèks, mwen sonje enfòmasyon sa epi mwen fèl.

Menm moman:

Mwen dekouvri liv la pale de kijan pou w bati richès.

Mwen sezi.

Yon bagay, menm jan ak tout moun, mwen te toujou reve dekouvri.

Mwen ouvri liv la epi’m komanse…

Mwen pa sonje ki kantite tan ki pase, men mwen te gentan rive nan mwatye liv la menm jou a.

Mwen li plis ke 100 paj jiskaske fè nwa rive sou mwen.

Epi’m di tèt mwen banm al dòmi, epi map kontinye nan demen si Dieu veut (malgre mwen te anvi kontinye)

Mal dòmi, men se a liv la map panse.

Mwen leve nan maten, mwen fè preske tout bagay ak liv la nan men’m.

Zòn midi, mwen gade mwen wèm rive nan denye paj la.

Mwen fini liv la.

Premye liv mwen li jiskalafen… e se patap dènye a.

Otè aprè otè.
Paj aprè paj.
Liv aprè liv.

Lanmou an pat sispann grandi. Mwen vinn damou fè lekti.

Mwen fè zanmi ak moun ki renmen li.

Mwen kòmanse nan pale de liv.
Mwen antre nan klèb lekti.

Bagay ke mwen patap janm dakò si w te dim kèk lane avan ke mwen tap nan pozisyon sa.

E sa ta pral banm yon leson ki enpòtan.

Se pat li mwen pat renmen li,

Mwen te jis potko jwenn liv ke mwen renmen.

Yon leson ke mwen te rejwenn nan quote sa:

“Li sa w renmen, jiskaske ou renmen li” - Naval


Petèt ke se nan sitiyasyon sa ke w ye.

Ou di w pa renmen li, oubyen w pa jwenn liv ki ba w anvi li yo.

Mwen konprann ou…

Paske mwen te nan sitiyasyon sa tou.

Ou ka pa gen chans menm jan avèm,

Pou w gen yon sè ki renmen lekti e ki kite yon liv ki pale de richès yon kote pou w al tonbe sou li.

Mwen chwazi jwe wòl sa pou ou.
(Epa wol sè a non, m konnen nou…)

Mwen vle jwe wòl moun kap ede w dekouvri pwochen liv ki pral chanje lavi w la.

Se sak fè mwen pran san’m poum chwazi pami 100èn liv ke mwen li.

17 liv pou w chanje lavi w an 2025.


Mwen mete yo an 4 kategori.

1- Lajan.
2- Relasyon moun ak moun
3- Pwodiktivite

4- Biznis

LAJAN

1- La Psychologie de l’argent - Morgan Housel

“Siksè finansye w pa depann de kisa w konnen, men de fason ou konpòte w”

Fason moun jere lajan yo plis baze sou konpòtman yo ak emosyon ke konesans teknik yo genyen.

Yon moun ki depanse mwens ke sa li antre, sere lajan’l epi envesti byen ap toujou jwenn pi bon rezilta ke yon moun ki metrize tout prensip finans yo men ki ap prete lajan epi depanse pou fè moun wè.

2- L’homme le plus riche de babylone - George S. Clason

“Fè bous ou grandi”

Prensip de baz sou lajan ki pap janm chanje yo se:

• Chache yon mwayen pou w antre lajan

• Sere omwen 10% ladann chak mwa

• Envesti nan domèn ou konprann

• Depanse mwens ke sa w antre

3- L’autoroute du Millionnaire - MJ Demarco

”Richès ap vini lè w rezoud pwoblèm a yon gwo echèl”

Si wap itilize biznis pou w bati richès ou dwe fokis sou solisyon ki gen “economie d’echelle” e ki fè gwo enpak olye solisyon ki lan ak tradisyonèl yo.

4- L’almanack de Naval Ravikant - Eric Jorgenson

”Chache richès olye w chache lajan ak estati sosyal.”

Vrè richès la ap vini gras ak konesans spesifik ou devlope, itilize levye epi kreye libète gras ak otonomi epi kè kontan.

Relationships and persuasion

5- Comment se faire des amis - Dale Carnegie

”Ou ka fè plis zanmi nan 2 mwa lè w montre enterè nan lòt moun ke si wap eseye pandan 2 lane nan fè moun entèrese avè w”

Itilize anpati, respè ak enterè nan lòt moun pou w ka bati relasyon solid, e sa se kle pou w ka bati enfliyans.

6- Les 48 lois du pouvoir - Robert Greene

“Pa janm depase mèt la”

Dinamik pouvwa, se yon bagay ki konplike, e li enpakte lavi nou nan nivo sosyal ak pwofesyonèl.

Chache konprann kijan ou dwe entèraji ak chak moun:

Paske pafwa bon aksyon konn mennen rezilta.
Menm si w te gen bon entansyon…

7- Influence et manipulation - Robert Cialdini

“Moun pa renmen lè w vann yo, men yo renmen achte”

Prensip kap ede w konvenk moun yo se:

• Resipwosite

• Angajman

• Prèv sosyal

• Otorite

• Apresiyasyon

• Rareté

8- The one sentence persuasion course - Blair Warren

Liv sa itilize yon grenn fraz pou ede w konvenk moun pi rapid.

Yon moun ap fè tout sa w vle si w:

1- Ankouraje rev li

2- Jistifye echèk li
3- Konfime sa li sispèk
4- Ede li voye woch sou enmi li yo

Prodiktivite

9- Deep work - Cal Newport

Wap ka rive akonpli plis bagay si w fè 2èd tan fokis olye ou pase 8èd tan ap eseye travay a demi.

Vrè pèfòmans ou se lè w bay tout sa w genyen ak yon grenn pwojè pou yon kantite tan.

Men kijan pou w aplike Deep work:

1- Chwazi yon priyorite

2- Prepare tout sa wap bezwen
3- Retire tout sa ki ka distrè w
4- Fokis pou yon kantite tan (li ka 2-3-4 èd tan)

Wap sezi wè sa w rive akonpli.

10- la semaine de 4 heures - Tim Ferris

“Travay entèlijan pi bon ke travay di”

Dizay lavi w yon fason kap ede w gen libète epi sispann travay tout lasent jounen pou w ka akonpli endepandans finansyè w.

11- La guerre de l’art - Steven Pressfield

“Rezistans ap konvenk ou tout jan, pou anpeche w fè sa w gen pou w fè a”

Pi gwo obstak ki anpeche w akonpli rèv ou yo.

Rezistans.

Lè w konn kisa pou w fè, ou konn kijan w dwe fè’l, men ou pa janm gen kouraj pou w kòmanse. Se sa ki rezistans la.

Anpil fwa, sa ki pi difisil la, se pa pase 4èd tan fokis ap travay, men se rive fè 5 premye minit yo. Paske pi gwo konba, se goumen ak rezistans ki anpeche w kòmanse a.

12- Effet Cummulé - Daren Hardy

Ti chwa piti, ti chwa ki senp + konsistan + tan = Gwo diferans

Siksè wap chache a pap vini gras ak yon gwo grenn aksyon, men yon kantite ti aksyon ki ajoute youn sou lòt sou yon gwo kantite tan.

Biznis ak Maketing

13- Expert secrets - Russel Brunson

“Mond lan ap tann ou montre’l konpetans ou”

Transfòme konpetans ou an yon pwodui epi bati yon odyans ka ede w bati yon gwo biznis.

Liv sa montre w kijan w ka vann ekspètiz ou nan nenpòt domèn ou ye an, pandan wap itilize zouti teknolojik yo.

14- 100M Leads - Alex Hormozi

“Plis ou gen kontak ak moun ki vle pwodui w la, se plis wap ka grandi biznis ou”

Grandi yon biznis mande yon estrateji pou w jwenn kliyan ki ka kontinye pouse biznis lan.

15- Good to great - Jim Collins

“Pi gwo biznis yo konstwi “flywheel” pou yo ka jwenn “momentum” ki fè chak siksè ranfòse lòt siksè aprè.

Flywheel lan ap ede biznis lan grandi tèt li poukont li.

16- Built to sell - John Warrillow

“Si w vle konstwi yon biznis pou w ka revann ni aprè, fòk li ka opere san ou”

Sa ap fèl gen plis valè sou mache a, paske li pap gen sa yo rele “Key person risk” lè biznis lan baze sou yon grenn moun.

17- Liv pa w la

Gen yon bagay ki te rive’m ke mwen ta swete w evite.

Se pran tout sa ki nan liv yo pou verite.

E pwoblèm nan ta pral vini lè mwen tonbe sou 2 liv ki di 2 bagay diferan.

Liv yo la pou gide w, pou ba w pèspektiv otè a.

Men pa gen liv kap ka ranplase pwòp eksperyans ou.

Itilize liv yo kòm gid, pa ezite kritike sa ou pa renmen.

Epi se konsa wap ka fè chwa ki baze sou pwòp refleksyon pa w.

Li pou w ka jwenn plis enfòmasyon.
Men itilize konpreyansyon pa w pou w ka pran pi bon desizyon.

Mwen swete sa te itil ou.

Na pale.

Duvenson METELLUS (Kreyatè KAYZENN)

PS:

Si w swete li youn nan liv sa yo,

men ou pa konn kijan pou w jwenn yo.

Ale sou youn nan sit sa yo pou w telechaje yo gratis:

Oceanofpdf.com

pdfdrive.to

PSS: Pataje newsletter sa ak zanmi w si li te itil ou.